Ég hefi í skyndi tekið ákvörðun um að hálfvitast til æskustöðvar með Gums og sennilega fá einhver hljóðfæri að sitja í,förum eftir vinnu á Frjádag og til baka á hinum alblóðuga sunnudegi.
Þannig að þeir sem ég þekkja á víkinni fögru geta farið að taka fram blóm og kransa ellegar blóð og hanska,hvað veit maður.
Annars ekki mikið tíðindanna af mér,var að koma úr gríðarhressandi gönguför þarsem labbað var að hinni víðfrægu ylströnd þeirra borgverja sem kennd er við Nauthólinn,ekki merkilegt fannst okkur sem gengum fram hjá.
En já þetta er svo,víkin um helgina og kannski maður taki úr einni ölkrús eða tveimur,ertu klár himms eða ertu enn að skófla í þig ólyfjum.

Javier: Svo skal öl bæta,benda á einhvern barþjón

Var að koma heim,búinn að steypibaðast og sit nú í myrkrinu og drekk öl.
Ég er að hlusta á diskinn úr kvikmyndinni In to the wild þarsem Eddie Vedder sér um tónlistina og ég get ekki annað en vorkennt þeim fjölmörgu mönnum sem ég þekki og þola ekki tónlist hans,þvílík myljandi snilld sem þessi diskur er.
Ég var andvaka í nótt sem leið og þá laust í höfuð mitt skáldsagnarpersóna sem ég ætla aðeins að segja frá og ég veit ekkert hvort ég skrifi eitthvað meira um hana í ókominni framtíð.

Sigga sæta úr Suðursveitinni.
Sigurlaug Jónsdóttir heitir ungfrúin og er alin upp í Suðursveit og ekki getur sá sem þetta ritar vitnað um hvort hún er skyld meistara Þórbergi.
Sigga er 20 ára og er nýflutt í höfuðborgina þarsem hún hyggst leggja stund á íslenskunám við Háskóla Íslands,hún leigir íbúð með vinkonu sinni úr námi sínu við framhaldsskóla Austur Skaftafellssýslu.
Nú hér á eftir ætla að ég að segja frá fyrstu galeiðuferð siggu þarsem hún fór með vinkonu sinni á knæpu er heitir Apótek.
Þessi samtöl sem á eftir fara eru um klukkan tvö aðfaranótt Laugardags.
Það skal kannski fyrst tekið fram að fegurð siggu er svo mikil að helstu töffarar falla í stafi er þeir sjá hana,hún er svo falleg af náttúrunnar hendi að það mætti halda að hún væri afkvæmi Almannagjáar og Dettifoss.
En af samtölum áðurnefndu,þær sitja tvær og drekka bjór í rólegheitum þegar sólbrúnn töffari dembir sér niður á stól við hliðina á okkar konu.
Töffari: Hvað segir gellan? nokkuð spræk?
Sigga: Jú þakka þér ég er ágætlega sett.
Töffari: (segir lágt en svalt)hvað segir þú um að kíkja í íbúð kallsins þarsem ég skal leyfa þér að njóta alvöru karlmanns?.
Sigga: Nei nú dámar mér,heyrir þú þetta jóna? bévítans strákgemlingurinn er að sverma fyrir mér,ég get nú sagt þér það sprjátungurinn minn að ég gæti aldrei gert mér dælt við þessumlíkt útlítandi manni eins og þér,með fráhneppta skyrtuna,iss það kæmi mér ekki á óvart þó þú fengi bæði kvef og kýlapestir í þessari næturfrostatíð.
Og þessi keðjugarmur sem hangir um óeðlilega dökkan háls þinn,þú ert  líkari kjölturakka sem þarf að binda við staur en biðlara,nei takk engar kenndir frá mér pent takk.
Töffari: stamar eitthvað og fer.

Ekki líður á löngu þangað til annar piltur þemur að borðinu sá er ævintýranlega mikið við skál og er hálf þvoglumæltur kallanginn.

Drukkinn drengur:Hvað segist eru gellur bara einar og enginn kall að passa upp á þær?.
Siggahlær) nei enginn varðmaður í för með okkur stútúngsstúlkum,en ekki sýnist mér á þér að þú værir beysinn í það hlutverkið,það er öngvu líkara en að þú hafir farið heldur djúpt í gambratunnuna og kneift líkt og Sigurður á Galdarstöðum í Froshálsgöngunum.
Nei ungi maður ég held að þú ættir að fara að ráði föður míns og skottast heim hella uppá gulan Braga og demba í þig einum lítra eða svo með rjómaslefi og dágóðum sykri.
Drukkinn drengur fer.....


Javier: kominn með tiltla á tvær metsölusjálfshjálparbækur Karlar eru frá Mars og Konur eru frá Raufarhöfn...Karlmenn kunna ekki að bakka í stæði og konur eru Geimverur

Getur það verið að Dóri DNA sé launsonur Kára Stéfánssonar?

Kalli kafari stofnaði kafarafyrirtækið Holy Diver fyrir 40 árum,þegar kalli hætti um daginn 67 ára þá kom upp úr kafinu að hann fékk engan lífeyri.

Getur það verið að kvennahreyfingin á Íslandi sé í raun uppspuni frá rótum og Bríet hafi í raun verið karlmaður...?

Ég hef ákveðið að gefa Javier örlítið meira vægi hérna,ástæðan er sú að mér finnst þessi síða svo mögnuð  http://www.hi.is/~jja/
Javier byrjar í dag og droppar hér inn með sínar athugasemdir í því sem hann sér eða finnst.

Ég sá feita miðaldra konu með sólgleraugu í dag,hún var að keyra beyglaðan bíl,ég var ekki hissa.

Já helgin bara liðin,leið of fljótt eins og vanalega og kannski er stór þáttur í því ótæpilegur svefn og einhver drykkja.
Fór heim til meistara röllz á frjádag og fékk mér með góðum mönnum og fagnaði þeim þrjátíu árum sem þessi höfðingi hefur lifað,það vantaði lopann en það var það eina sem má setja út á.
Ég fór í bíó með vinkonu minni í gær á forgetting Sara Marshall og það var alveg kærkomin skemmtan í þynnkunni,drepfyndin mynd þó svo að grunnur handrits sé tekinn úr rómantísku gamanmyndaklisjuskúffunni í handritakommóðu Hollywoods.
En að öðru ég ætlaði eitthvað að tala um neytendamál hérna,aðeins sunnudagstuð svona...
Ég stóð frammi fyrir því að þurfa annaðhvort að breyta nafninu á netinu hér eða skipta hreinlega um netfyrirtæki og ákvað þessvegna að fara í símabúð og athuga kaup og kjör,ég fór í Ármúlann og lenti á einhverjum sólbrúnum egóista sem hreinlega nennti ekki að vera í vinnunni og ég sá á tölvuskjánum að hann var að skeggræða við einhverja stúlkukind á msn og nennti ekkert að tala við mig,nú hef ég oft áður lent í því að síminn er skítafyrirtæki og er nokk sama um viðskiptavininn og þetta var bara til þess að ég varð meðvitaður neytandi og gerðist neitandi, ég hringdi í Tal,eftir samtal við fínasta dreng sem vildi allt fyrir mig gera og það kom í ljós í enda símtals að kannski var ástæðan sú að hann fékk einhvern bónus fyrir hvern nýjan kúnna.
Niðurstaða símtals varð sú að ég skipti yfir til þeirra um mánaðarmót bæði með netið og heimasímann,þegar ég kom heim úr vinnunni á Föstudag var búið að loka fyrir netið og enn langt í mánaðarmót,ég hringdi því lóðbeint í Tal og var númer 7 í röðinni og fékk því að hlusta á drepleiðinleg lög í tuttugu mínútur,einhver stráklingur svaraði svo og eftir mikla tregðu í honum og æsing sneiðar og hótanir um að fara með þetta lengra þá gaf hann mér fyrsta mánuðinn frían,enda þarf ég að borga allan maí hjá Símanum,eftir símtalið fór ég og náði í ráter og beið í biðröð í hálftíma,viti menn,þegar ég kom heim virkaði hann ekki.
Fór á Laugardeginum og náði í annann,hann virkar en netið er lúshægt,keypti átta megabæta tengingu og ekki nóg með það netið er alltaf að detta út.
Ég þoli ekki svona þetta er óþolandi vanvirðing.
Það er breskur þáttur á skyhnettinum sem ég horfði oft á á sjónum um svona mál þarsem fyrirtæki sem voru að taka kúnnana í görnina voru tekin fyrir og farið var yfir þetta í þaula og þeim var boðið að koma og svara fyrir sig.
Það verður nú seint á Íslandi held ég,mönnum er yfirleitt nokk sama en mér finnst þó okursíða dr gunna ágætis byrjun.

Skrítin vinnuvika þarsem ég kem til með að vinna tvo daga frá 4 til miðnættis og svo fara grjóni og flóki norður á fimmtudag..þannig að ég verð einn í koti um helgina og vonandi getur einhver leikið.

Javier: I´m in my prime....

Ætla að taka á nokkrum hugsunarefnum sem skutust upp í þunnhærða kollinn minn á síðustu dögum,svolítið skylt hugðarefnum færslunnar á undan.

Endurvinnsla: Ein auglýsing með leiðinlega hressa gaurnum( sem Yngvi heldur fram að sé Pétur Jesú en ég er ekki sammála) drepur hann á því að menn verði að vera duglegir að skila inn bylgjupappa hann megi endurvinna 7 sinnum....og þá fór ég að velta fyrir mér,hvernig í andskotanum sjá þeir þegar bylgjupappinn kemur inn í 7unda skiptið,stekkur bylgjupappasérfræðingurinn inn í gáminn og flokkar þann pappa frá,sé fyrir mér sumarafleysingastrákinn og gamla reynda bylgjukallinn,hvað ertu að gera drengur þetta gengur ekki þessi er að koma inn í 7unda skiptið ertu alveg kjáni?.

Auglýsingar: Dæmi um mjög góðar auglýsingar í mínu minni sem er reyndar stórskemmt af áfengisneyslu..
Thule...Allar Thuleauglýsingar frá því að danirnir hupplegu komu fyrst eru frábærar og breyttu Thulesölu frá því að það stóð til að hætta að framleiða hann í söluhæsta íslenska ölið.
Hreyfilsauglýsingin þegar Flosi rappaði varð til þess að alveg sama þó ég fengi alvarlegan heilaskaða þá væri þetta það sem ég mundi ekki gleyma.
Heimaísinn leiðinlegt lag en hafði tilætluð áhrif á mig sönglar reglulega í hausnum mínum.
Talauglýsingar sem fóstbræður sáu um,alveg brilljant húmor og þegar ég hugsa um það þá eru allar auglýsingar sem Jón Gnarr hefur verið í alveg brilljant.
Og að lokum KB auglýsingar Þorsteins Guðmunds....já og hvatr segja bændrr auglýsingin með honum fyrir esso djefill er hún fyndin...
Leiðinlegar auglýsingar...hér gæti ég talið upp endalaust,en döbbaðar sjampóauglýsingar fá mig til að gubba,og lu leikurinn...guð minn almáttugur af hverju hafa feministar landsins ekki mótmælt því að þar eru alveg heilalausar konur að missa sig yfir engu....
Ég á eftir að drepa á fleiru í þessari færslu þannig að ég er að spá í að frysta upptalningu á leiðinlegum auglýsingum.

Neytendamál: Ég var búinn að búa til heljarpistil um þessi mál..en er of þreyttur,kem með það á morgun eða hinn...bíðið spennt...eða ekki

Javier: Það er óvenjumikið af bylgjupappa sem er að koma inn í fimmta skipti þessa dagana

Andri Valur brjálaðist við mig um daginn vegna þess að ég flokka ekki ruslið,hendi bara öllu í tunnuna,og svo kallar þú þig vinstri grænan sagði hann svo með hneykslunartón.
Ég hef ekki vanið mig á þennann góða sið,en ég negli alltaf bjórdósunum sem Sigurjón svolgrar úr í poka og fer með þegar litla geymslan er orðin full,eins eru þar margar safaflöskur eftir bindindismanninn mig.
Það var einmitt í dag sem ákveðið var að skomberast út á granda með herlegheitin og við bræður flokkuðum rúmlega 200 stykki af bjórílátum (eftir sigurjón) og lífrænum safaílátum (eftir mig).
Þegar á endurvinnslustöð var komið þá var heljarbiðröð en við létum okkur hafa það að bíða,þegar við komumst svo inn í skúrinn voru þrjár konur á undan okkur,þær voru aldeilis að láta greipar sópa í endurvinnslunni kellurnar,þessar dásemdarkonur voru allar með einn haldapoka "sex dósir,tvær plast og tvær gler sagði sú sem var á undan mér.
Magnað,hvað ætli bensínið hafi kostað til að keyra með þessi ósköp? og svo gekk hún alveg fram að mér þegar hún birtist aftur og tróð sér fram fyrir mig til að fá bréfpokann sinn aftur.

Það er kannski best að taka nýju Húsasmiðju auglýsinguna fyrir svona af því að ég er byrjaður á tuði,hvaða snillingi datt þessi andskotans vitleysa í hug.....Húsi og Vala af því að Húsasmiðjan og Blómaval voru að sameinast fyrir um ári síðan,og þetta lag...og þessi nef.... langar að stinga úr mér augun og troða þeim í eyrun.
Annars allt meingott...................
Held ég verði að taka próflokaþamb himmsa til heiðurs um helgina..


Javier: væri gummi í byrginu ekki bara hressari ef hann drykki mjólk?,hvað veit ég um það?

Það er Gunnahvítasunna og við erum aðallega að innipúkast feðgar,enda er það ágætt sossem en Tristan ætlar með dísu frænku sinni í bíó á eftir á undrahundinn,pabbinn kemst eigi með sökum þess að enski boltinn er akkúrat á sama tíma og Flóki tók það ekki í mál að fara á morgun,alveg sama hvað ég rökræddi við hann,þrjóskur eins og pabbinn.
Ég er ekki alltaf jafn duglegur að bomba hér inn einhverri vítleysu,ég gæti kannski bloggað meira ef ég væri svona moggabloggari,þá gæti ég skrifað eitthvað um það t.d að Ashton Kutcher pissaði í garðinn sinn o.s.frv...nei ég held mig við þessar innantómu upplýsingar um mig og helstu hugðarefni mín.
Annars fékk ég smá egóbúst í Skarpi síðast þegar Leifur Gríms útnefndi mig sem uppáhaldsrithöfundinn sinn,get nú ekki annað en verið stoltur við þessháttar útnefningu.
Jæja Keffe og retta.

Javier: væri ég dauður ef ég drykki ekki bjór? ég veit það ekki ég drekk bjór

Ég segi nú bara svipað og hann afi minn heitinn þegar maður kom í heimsókn til hans,það kemur enginn,ég segi bara, það kvittar enginn.
Ljónhægt að frétta af mér annars,tók smá fyllerísskrens samkvæmt vana,guð sé lof í krossinum að þetta er bara önnur hver helgi sem fer í svona sora og saurlífislifnað.
Djöfullinn ég var að muna að ég þarf að fara á melinn að taka úr vélinni,hélt ég væri sloppinn við hvurskonar rask úr sófa.
Annars eru mjög skemmtilegar krossanir þessa dagana of flókið að tala um það en við himmi tengjumst á nýjan máta...nei við erum ekki farnir að sofa saman.
Annars eru þeir kumpánar að þamba kaffi og þykjast vera að læra,hef þá grunaða um slæpingshátt,en hvað veit ég svosem, ég bara skúra hérna.
Gunnar vinur hans grjóna var að segja mér frá skemmtilegri sögu af lækni einum sem ber nú eitt stærsta embættið á Íslandi,hann fékk til sín stúlku sem átti við þann kvilla að stríða að það var alltaf að líða yfir hana,eftir góða skoðun sagði hann við hana,sko þú ert annað hvort með berkla eða H.I.V. eftir skoðun annars læknis kom svo í ljós að stúlkan var blóðlaus sökum örs vaxtar,
Jæja best að henda sér í sauðskinn og álafoss og skemberast fram hjá þeim kínversku, til þeirra hægversku að taka úr vélinni,því eins og konan sagði um árið þetta tekur sig ekki úr vélinni sjálft og fékk fyrir þessi ummæli fálkaorðu og lindu buff.

Javier: Borgastjórastóll,,,,As good as it gets.....

Fram þjáðir menn,,,ég var þjáður í dag og komst öngvan veginn í kröfugöngu sökum þynnildis sem ágerist leiðinlega með aldrinum,ég lá bara fyrir í allann dag með íbúfen í æð og þambaði vökva.
Fínt samt að vera í fríi á fimmtudegi,gerði mér ekki grein fyrir hvað þetta eru skemmtilega margir frídagar sem maður fær,þarsem ég stóð öldurnar svo lengi og þar var aldreigi spurt um trú eða verkalýðsbaráttu,alltaf sama vinnan,var kannski gott læri með sultutaui í matinn en það var allt of sumt.
Glæsilegur þáttur um félaga sem voru að flytja í eigin íbúð á rúvinu í kvöld,íslenskur þáttur alveg gríðarvel gerður og það mætti vera meira af svona þáttagerð.
Hitti lopann í gær og það var helvíti gott ég var farinn að sakna hans,vont þegar einhverjum sem maður umgengst svona mikið er kippt í burtu lengst norður á hjara.
Heiddi sagði mér svo stórkostlega sögu í gær,þegar lalli johns var að lauma sér inn til hans og heiddi kom að kallinum í jakkafötunum,honum fannst þetta svo fyndið að hann hringdi ekkert á lögguna.
Annars er ég bærilegur...stefni á semirólega helgi,allir eitthvað að próflesast eða vesenast,maður kíkkar kannski í einn tvo með lopanum en ég verð að sætta mig við að ég er ekki eins og ofvirkur lambhrútur lengur,verð að vera rólegri í tíðinni,taka fleiri kvöld heima að bródera.

javier: hefði gert byltingu í dag ef ég hefði ekki verið þunnur með sneiðinni...